Jar in Lolok an ‘Abdu’l-Bahá
(Jar in ej an Abdu’l-Baha, jej jar kake ilo Shrine eo An. Jemaron bar jar kake ilo jabrewot ien.)
Jabrewot eo ej jar kake jar in ilo etta im mol naj boktok monono im lanlin nan Dri Jerbal in (‘Abdu’l-Baha); einwot ne ear jelmaliki.
E Eaibuijuij otem Aibuijuij!
O Anij, ao Anij! Ilo etta im kin drenin kemjalal, ij lelonwaj bein owar kein ao nan Kwe im likit meja ion bunal iturin Aor eo Am, eo eutiej ilon in jelalokjen an ro dri meletlet, im ilon in nebar an aolep ro rej kaibuijuij Yuk. Joij im lale dri jerbal in Am, eo ej bed im etta iman aor eo Am, ilo an mejen tiriamo eo am erreitok, katuloke ilo Lometo in joij eo Am ejelok jemlokin.
Iroij! Ej juon Karejeram eo ejarmol im etta, juon dri kamakoko ej oware Yuk, ej bed ilubdren Beim, ilo an mol in ajewaj jar ko an nan Yuk, likit an kejatdrikdrik ilo Kwe, etor drenin kemjalal iman Mejam, kir nan Kwe ilo an oware Yuk im ba:
O Iroij, ao Anij! Letok nan io jouij eo Am bwe in jerbal nan dri yokwe ro Am, kakajur io ilo ao jerbal etta nan Kwe, keromaklok meja kin meram in kautiej ilo melan eo Am ekwojarjar, im jar nan ailin in utiej potata eo am. Jiban io bwe in jab lomnak kin io iman jikin drelon waj ilo aor eo Am ilan, im jiban io bwe in maron ellok jen men otemjej ilo melan ko Am rekwojarjar. Iroij! Letok bwe in idrak jen cup in karmejete io make; kin nuknuk eo an kanuknuk io, im ilo lometo eo an katulok io. Kommane io bwe in einwot bunal ilo ial eo an dri yokwe ro Am, im kemlim io bwe in ajewaj jitob eo ao nan lal eo ejeramon kin bunten ne ko neen dri kelet ro Am rej etetal ilo ial eo Am, O Iroij in Aibuijuij Eo Eutiej tata.
Kin jar in dri jerbal in Am ej kir Yuk, ilo jimarok im ilo jota. Kotobrak konan eo an buruon, O Iroij! Keromak lok buruon, kamononoik enbwinin, kaurur meram eo an, bwe en maron jerbal nan Katak eo Am im nan dri jerbal ro Am.
Kwe Dri ujleptok, Dri Tiriamo, Eo Eobrak kin Men Otemjej, Dri Joij, Dri Tiriamo, Eo Eobrak kin Yokwe.
