Ti pagidi ye leni ha, ô n Tienu ! A tie yua ke, leni mayenma yua ñani o ñobu nni, gali ki taani yaala n tagi kuli, ke leni o tidianmoanu diani, paadi o ŋoadikaaba leni bi yaba. N tie siedi, ô n Tienu ke ya duagidima n tie ne nni, leni mayenma yua ñani a kani, yaala n tagi kuli cabi ban kpe, ke leni matuama go, han gandi yaaba kuli, a ŋampaabu leni a ŋanma po, ba mi yepanma.
Lani ya po n cedi ke n jaandi ha ki go donda han bua yaaba kuli yeli po, leni han cedi ke bi gua mali leni a ñima yua puuni mi yema po ki tiini ña a jagili ñinbuli kani. Nani han puni ba li miali leni a ŋanma yua ki pia bianu yeni, cedi a buadingima po, ô n Tienu, ban gua ki lebidi cain a jagili kani ; nani han cedi ke bi kua a Dandanli cancanli kani yeni, cedi a todima po, ban da fagidi leni ha.
Luodi bi pala po, ô n Tienu, a banma buliñona po ban fidi ki bandi ke a tie yua ki pia bandima a tagima po, yua n yabi ki cie o nibuolu aniali ki ba bando, ke ban da ŋoadi bi niyiekaaba yaaba n pia o lanbu ki tua ban maadi a yeli po.
Pa ba o fidu, ô n diedo, ban loli bi yuli a Dandanli kani ŋama, ke bi yama n da yagi, yaaba ke bi pabuama po, pua a kpanjanbiada, yaala ke bi kuani a walimu leni a diani nni.
A bani ô n Tienu, ke n gba loup moayi yaaba n janbi ki la a ŋoadikaaba tiadi. Guudi a buakaaba leni bi tuadi biada ki cedi ban loli cain han duagidi yaala po ya jaanma n tie ne nni, yua ke a banma po tua kuli ki cie.
Bili bi po, ô n Tienu, yaala n baa pia bi po ti ñuadi. Yendi ba leni a banma yenyenma ban la ŋama ke a yabi ki cie bonli kuli, a yenyencianma a tagima siiga po leni a gbamanu yaala n ye tanpoli leni tinga nni kuli po. A pia o fidu ki ba tieni han bua yaala. Tienu toa ki ye ke laa tie fini, yua ya yenpagidi n cie ke bi niba kuli miadi o gaama.
Ti pagidi ye leni ha, ô fini yua n tie mi tagima kuli diedo.
